O presidente da Deputación de Ourense, Luis Menor, recibiu hoxe no Pazo Provincial a unha representación do Club Ximnasia Pavillón, á que felicitou polos “bos resultados” logrados no Campionato do Mundo por Idades e no primeiro Campionato do Mundo Júnior celebrados na localidade de Birminghan, en Reino Unido.
O Club ourensán participou con oito deportistas dos 26 que representaron á selección española, sendo o equipo que máis ximnastas aportou a dita selección. Por elo, Menor agradeceu “o esforzo e o traballo realizado polo club e, sobre todo, por estes deportistas que coa súa disciplina levaron o nome da provincia de Ourense a lograr unha gran posición nestas competicións mundiais”.
Na recepción no Pazo Provincial estiveron presentes sete ximnastas do club, así como a adestradora, Ada Pazos, e maila presidenta Carmen Blanco.