Menú
Pechar

A Deputación e a Federación Española de Hóckey organizarán en xaneiro de 2022 unha competición internacional no novo campo de Ourense

Manuel Baltar anunciou este acordo tralo encontro que no Pazo Provincial mantivo cos máximos representantes nacionais e galegos desta disciplina, que estes días acompañan a preto de trinta xogadores das seleccións española absoluta e sub-21 que estrean o novo campo de Mariñamansa,  “a cuxa reforma contribuíu a institución provincial para dotar á cidade e á provincia dunhas instalacións modélicas e únicas en Galicia”.

O presidente da Deputación de Ourense, Manuel Baltar, e o presidente da Federación Española de Hóckey, Santiago Deó, acordaron organizar en xaneiro de 2022 un torneo internacional no novo campo de Mariñamansa, “a cuxa reforma contribuíu a institución provincial para dotar á cidade e á provincia dunhas instalacións modélicas e únicas en Galicia”. Así o anunciou Manuel Baltar tralo encontro que no Pazo Provincial mantivo co presidente da federación, ao que acompañaban o director deportivo e o secretario nacional, Pablo Sánchez e José Antonio Gil; o presidente da xunta xestora da federación galega, Alberto Estévez; e os vogais Roberto Barata e Francisco Javier Masid.

As novas instalacións de Mariñamansa inclúen o Centro de Tecnificación de Hóckey de Galicia (CeTeGa), un compromiso que o propio Manuel Baltar asumiu cos directivos da federación galega para situar en Ourense o eixo da organización, coordinación técnica e xestión de competicións e licencias, a promoción e divulgación deste deporte e a mellora e cualificación de xogadores, técnicos, árbitros e xuíces.

O presidente provincial subliñou que durante estes días “Ourense foi a capital nacional do hóckey coa presenza de preto de trinta xogadores das seleccións españolas absoluta e sub-21, que escolleron estas novas instalacións para preparar os seus próximos compromisos e o equipo que servirá de base para os próximos xogos olímpicos”. Precisamente Manuel Baltar visitou o novo campo, onde tivo a oportunidade de conversar co adestrador da selección absoluta, Max Caldas, que se estrea no cargo logo da responsabilidade como técnico dos equipos nacionais masculinos e femininos de Países Baixos.

A alianza entre Ourense e o hóckey, “nunha disciplina que grazas á súa gran tradición sitúa á nosa cidade como a que máis practicantes ten do noroeste da península”, é unha aposta máis da Deputación, dixo Manuel Baltar, “por ese ecosistema de turismo deportivo que continúa incorporando novas disciplinas, agora co hóckey e antes co ciclismo, a BTT, o remo ou os deportes de aventura e natureza”.

A este obxectivo, engadiu, “contribuirá a chegada da alta velocidade, que fará do noso territorio un espazo perfecto para a competición, tanto nacional como internacional, ademais dun lugar para presumir e onde o deporte xa se escribe con maiúsculas”.